Sunday, April 27, 2008

ആനയെ വെറുതേ വിടൂ

ഈ വര്‍ഷം ഇതുവരെ നാല്പ്പത്തൊമ്പതു പേരെ തെക്കേയിന്ത്യയിലെ നാട്ടാനകള്‍ കൊലപ്പെടുത്തി എന്ന് വാര്‍ത്തയില്‍ കണ്ടു. വാഹനാപകടങ്ങളില്‍ മരിച്ചവര്‍ അതിലും അധികമാണല്ലോ എന്ന് സമാധാനിക്കാന്‍ ചിലര്‍ക്കെങ്കിലും കഴിഞ്ഞേക്കും. ചോദ്യമതല്ല, ആനയെ എന്തിനു സമൂഹത്തിനു വേണം?

ആന വളര്‍ത്തു മൃഗമാണോ?
മനുഷ്യന്‍ ഒരുപാട് ജന്തുക്കളെ ഇണക്കി വളര്‍ത്തുന്നു. കന്നുകാലികള്‍, കുതിര, ഒട്ടകം, കോഴി, പട്ടി, പന്നി, താറാവ്. ഇവയെല്ലാം മനുഷ്യസമൂഹത്തിനൊപ്പം, അവന്റെ അധീനതയില്‍ ജനിച്ചു വളര്‍ന്ന് പ്രജനനം നടത്തി മരിക്കുന്നു. ഇണക്കപ്പെട്ടവയെ തുറന്നു വിട്ടാലും അവ മനുഷ്യക്കോളനി വിട്ട് പോകാന്‍ താല്പ്പര്യം കാണിക്കാറില്ല, തെരുവുനായ്ക്കളും പൂച്ചകളും ഫെറല്‍ കന്നുകാലികളുമെല്ലാം ആ സത്യം നമ്മെ മനസ്സിലാക്കിത്തരുന്നു. ആനയെ മെരുക്കാന്‍(ഇണക്കുന്നു എന്ന പദം പോലും നമ്മള്‍ ഉപയോഗിക്കില്ല) തുടങ്ങിയിട്ട് രണ്ടായിരം വര്‍ഷത്തിലും അപ്പുറമായി അതായത് കുറഞ്ഞത് മുന്നൂറു തലമുറ ആനകളെ നമ്മള്‍ ഇണക്കാന്‍ ശ്രമിച്ചു. ഇന്നും കാട്ടിലൊന്നഴിച്ചു വിട്ടാല്‍ അവന്‍ ഒരു സംശയവുമില്ലാതെ കാട്ടാനപ്പറ്റത്തില്‍ ചെന്നു കയറും. കാട്ടാനകള്‍ ചിന്നം വിളിച്ച് അവനെ എതിരേല്‍ക്കുകയും ചെയ്യും. (ലിങ്ക് ഇല്ലെന്നു വേണ്ട - http://www.telegraph.co.uk/earth/main.jhtml?xml=/earth/2008/02/29/eaeleph129.xml , http://www.green-planet.nl/greenplanet/RTTW ) ഇതുവരെ വായിച്ചു കേട്ടതില്‍ ഒരു കുട്ടിയാനയെ മാത്രമാണ്‌ ആനക്കൂട്ടം അംഗീകരിക്കാന്‍ മടി കാട്ടിയ‍ത്. ഒറ്റപ്പെട്ട സംഭവമായി ഇതന്വേഷിക്കേണ്ടിയിരിക്കുന്നു.

ആന എങ്ങനെ മെരുങ്ങുന്നു?
ആനയെ കൂട്ടിലടച്ച് അതിന്റെ ഫ്രീ വില്‍ തകരും വരെ കല്പ്പനകള്‍ അനുസരിക്കാന്‍ പഠിപ്പിക്കുകയാണ്‌ ചെയ്യുന്നത്. തോട്ടിയും കത്തിയും കൊണ്ടാണോ വെറും വടികള്‍ ഉപയോഗിച്ചാണോ എന്നതില്‍ വലിയ കാര്യമില്ല. മെരുക്കലിനിടെ ആന ചെരിയുന്നത് സാധാരണമാണ്‌ (കഴിഞ്ഞ വര്‍ഷം കേരളത്തില്‍ തന്നെ കൊമ്പനും കുട്ടിയും ചെരിഞ്ഞിരുന്നു) .
.

ആത്മവീര്യം പോയ ആന മനുഷ്യന്റെ ആജ്ഞകള്‍ അനുസരിക്കാന്‍ നിര്‍ബ്ബന്ധിതനാവുന്നു. എന്നാല്‍ അതൊരിക്കലും നാട്ടുമൃഗമാവുന്നില്ല. ഒരു ചാണ്‍ വയറിനു വേണ്ടിയും കത്തിയും തോട്ടിയും കൂച്ചുവിലങ്ങും ഭയന്നും അവന്‍ മനുഷ്യനു കീഴ്പ്പെട്ട് ജീവിക്കാന്‍ തയ്യാറാവുന്നു. വന്യമൃഗങ്ങള്‍ക്കെല്ലാം തീയും ശബ്ദവും പേടിയാണ്‌, പക്ഷേ സര്‍ക്കസ്സില്‍ സിംഹം തീവളയത്തിലൂടെ ചാടും. അതുപോലെ തന്നെ ചെണ്ടയും വെടിയും തീവെട്ടിയും ആന സഹിക്കാന്‍ ശീലിക്കും.

എന്താണ്‌ മദമിളകല്‍?
ആനയ്ക്ക് മദമിളകി എന്നു വച്ചാല്‍ ഭ്രാന്തിളകി എന്നാണര്‍ത്ഥമെന്ന് ചില മൂഢന്മാരെങ്കിലും ഇന്നും ധരിച്ചു വച്ചിട്ടുണ്ട്. ആന ഇണകളായി ജീവിക്കാറില്ല, കൊമ്പന്മാര്‍ ഒരു കൂട്ടവും പിടികളും കുട്ടികളും മറ്റൊരു കൂട്ടവുമായി ആണ്‌ കഴിയാറ്‌. കാലാകാലം എല്ലാ കൊമ്പനാനകള്‍ക്കും ഇണചേരാനുള്ള സമയമാകുമ്പോള്‍ ശരീരത്തില്‍ ടെസ്റ്റോസ്റ്റെറോണ്‍ അളവ് അമ്പതിരട്ടിയിലധികമായി കൂടുകയും അവ മദജലത്തിലൂടെയും നിരന്തരമൊഴുകുന്ന മൂത്രത്തിലൂടെയും അതിഭയങ്കരമായി ഫിറോമോണുകള്‍ പുറപ്പെടുവിക്കുകയും ചെയ്യും. ഹോര്‍മോണ്‍ സര്‍ജ്ജ് മൂലം അതിഭയങ്ക സ്വഭാവമുള്ള അവനെ വിട്ട് മറ്റാനക്കൂട്ടം പോകുകയും കാമാസക്തിയുള്ള പിടി മാത്രം അവനടുത്തേക്ക് ചെല്ലുകയും ചെയ്യുന്നു.

ആനകള്‍ വളരെ വലിപ്പമുള്ള ജന്തുക്കളായതുകാരണം ദീര്‍ഘനേരം കൊമ്പനെ പുറത്തു വഹിക്കാനോ പലതവണ ഇണചേരാനോ പിടിയാനയ്ക്കു കഴിയില്ല എന്നതിനാല്‍ കൃത്യമായ ബീജോല്പ്പാദന സമയത്ത് ഒരു ലൈംഗികവേഴ്ച അവയുടെ വംശം നിലനില്‍ക്കാന്‍ അത്യാവശ്യമാണ്‌. ആ സമയം വന്നെത്തിയ കൊമ്പനെ തോല്പ്പിക്കാന്‍ അവനിലും വലിപ്പമുള്ള എന്നാല്‍ ബീജോത്പാദന ചക്രം ശരിയായിട്ടില്ലാത്ത മറ്റൊരുത്തന്‍ എത്തിയാല്‍ ഗര്‍ഭധാരണം നടന്നില്ലെന്നു വരും. അതിനാല്‍ കുട്ടിയെ ഉത്പാദിപ്പിക്കാന്‍ സമയമായ കൊമ്പന്‍ ആരെയും തോല്പ്പിക്കുന്ന സൂപ്പര്‍ ആന ആയി കുറച്ചു ദിവസം മാറുകയാണ്‌ മദമിളകല്‍ വഴി സംഭവിക്കുന്നത്. എത്ര മനോഹരമായ പ്രക്രിയ!

അതി ശക്തമായ ഊര്‍ജ്ജ വിനിയോഗം നടത്തുക വഴിയും മദജലവും നിരന്തരമായ മൂത്രവിസര്‍ജ്ജനവും വഴി അതിവേഗത്തില്‍ ഡീഹൈഡ്രേഷന്‍ സംഭവിക്കുകയുമാണ്‌ മദിച്ച ആനയ്ക്കു സംഭവിക്കുന്നതെന്ന് മനസ്സിലാക്കി അവനു ഇടച്ചങ്ങല കെട്ടുകയും വെള്ളം കുടിക്കാന്‍ കൊടുക്കാതെയിരിക്കുകയുമാണ്‌ തളര്‍ത്താന്‍ എളുപ്പവഴിയെന്നു കണ്ടുപിടിച്ച മാതംഗലീലാവിലാസക്കാരെ എന്തു പേരു വിളിക്കണം നമ്മള്‍?

ഇടഞ്ഞ ആനകളെല്ലാം മദപ്പാടിലാണോ?
ആന കല്പ്പനകള്‍ അനുസരിക്കുന്നത് അതിന്റെ ഗതികേടുകൊണ്ടാണ്‌. വെടിയും പടക്കവും തീയും പുകയും ജനങ്ങളുടെ ആരവവും വെയിലും ആയാസവും ഉറക്കമില്ലായ്മയും വിശപ്പും ദാഹവും ഭീതിയും അതിനു കൊടുക്കുന്ന സമ്മര്‍ദ്ദം അതിഭീകരമാണ്‌. അത്തരം സാഹചര്യത്തില്‍ മനോനില തെറ്റി ഈ ജന്തു പെരുമാറുന്നതില്‍ അത്ഭുതപ്പെടാനില്ല. അതിനെ പഴിക്കാനുമാവില്ല.

മദപ്പാടുള്ള ആനയെ മദജലത്തിന്റെ ദുര്‍ഗ്ഗന്ധം (മനുഷ്യനാണേ, പിടിയാനയ്ക്ക് അത് ലോകത്തേറ്റവും ഇഷ്ടമുള്ള സുഗന്ധമാണ്‌) മൂലവും സ്വഭാവത്തിലെ മാറ്റം മൂലവും ഏതു മണകുണാഞ്ചന്‍ പാപ്പാനും ഉറപ്പായി തിരിച്ചറിയാം. അവയെ അപ്പോഴേ ഇടച്ചങ്ങല കൊളുത്തി പട്ടിണിയിലാക്കുകയാണ്‌ ചെയ്യാറ്‌. അമ്പലങ്ങളിലും മറ്റും ഇടയുന്ന ആനകള്‍ മാനസികവും ശാരീരികവുമായ പീഡനങ്ങള്‍ മൂലം സ്വയമറിയാതെ പ്രതികരിക്കുന്നവരാണ്‌ മഹാഭൂരിപക്ഷവും.

ആനയെ നമുക്കെന്തിനാണ്‌?
പ്രധാനമായും മൂന്ന് ആവശ്യത്തിനാണ്‌ ആനയെ മെരുക്കാന്‍ മനുഷ്യന്‍ തുടങ്ങിയത്. യുദ്ധത്തിന്‌, ഭാരോദ്വഹനത്തിന്‌, അലങ്കാരത്തിന്‌. യുദ്ധത്തിനിന്നു വെടിക്കോപ്പു മുതല്‍ വിമാനം വരെയുണ്ട്. ഭാരോദ്വഹനത്തിനു സങ്കീര്‍ണ്ണയന്ത്രങ്ങളും ട്രക്കുകളുമുണ്ട്. ബാക്കിയാവുന്നതോ വെറും ദര്‍ശന സുഖം.

കേരളത്തില്‍ എന്തുകൊണ്ട് ഉത്സവങ്ങള്‍ക്ക് ആനയെ എഴുന്നെള്ളിക്കുന്നു?
കേരളത്തിലെ അമ്പലങ്ങളില്‍, അതില്‍ തന്നെ ദേവീക്ഷേത്രങ്ങളില്‍ പ്രത്യേകിച്ചും ദേവസ്വം വക ഭാരിച്ച സ്വത്തുക്കളും പണ്ടങ്ങളുമുണ്ടായിരുന്നു. പല കരകളും ഊരുകളും മൊത്തമായി ദേവിമാരുടേതായിരുന്നു. അതിന്റെ ഉപഭോക്താക്കളായി നമ്പൂതിരിമാരും മാടമ്പിമാരും കഴിഞ്ഞിരുന്നു. അമ്പലങ്ങളില്‍ ആന വേണ്ടിവന്നത് ഈ സ്വത്തുക്കളുടെ സം‌രക്ഷകരായിട്ടാണ്‌. തിരുവാഭരണങ്ങള്‍ അണിയും ദിവസങ്ങളില്‍ കൊമ്പന്മാരും പടയാളികളും ഘോഷയാത്രകള്‍ നയിക്കേണ്ടിവന്നതും തസ്കര ഭീഷണിമൂലമെന്ന് അനുമാനിക്കാം. കേരളത്തില്‍ കുതിരകള്‍ അപൂര്വ്വമായിരുന്നു അക്കാലത്ത്. വെടിമരുന്നു പ്രയോഗവും ആനകളും ഭടന്മാരും ബ്രഹ്മസ്വങ്ങളുടെയും ദേവസ്വങ്ങളുടെയും സുരക്ഷ പ്രദര്‍ശിപ്പിച്ചിരുന്നത് ഇന്ന് വെറും ആചാരം മാത്രമായി.

എന്തുകൊണ്ട് അടുത്ത കാലത്തായി കേരളത്തില്‍ ആന ഇടയുന്നത് കൂടുന്നു?
ഒന്ന്: ആനകളുടെ എണ്ണം ക്രമാതീതമായി ഉയര്‍ന്നു. എഴുപതില്‍ നൂറോളം ആനകളാണ്‌ കേരളത്തിലുണ്ടായിരുന്നത്. ഇന്നത് അറുനൂറിലധികമായി . മനുഷരിലെ ഇടയിലെ ആനകളുടെ എണ്ണം കൂടുന്നതിന്‌ ആനുപാതികമായി അവ മനുഷ്യനെ ആക്രമിക്കുന്നതും വര്‍ദ്ധിക്കും.

രണ്ട്: ആനകളെ സ്ഥിരമായി അമിതാദ്ധ്വാനം ചെയ്യിക്കുകയും പട്ടിണിക്കിടുകയും പീഡിപ്പിക്കുകയും ചെയ്യുന്നു.

ഇന്ന് മൊത്തമുള്ള നാട്ടാനകളുടെ പകുതിയും ആസാമിലും കേളത്തിലുമാണ്‌. ഇന്ത്യയാകമാനം നാട്ടാനകളുടെ എണ്ണം കുറയുകയാണ്‌, കേരളത്തിലതു വര്‍ദ്ധിച്ചു വരുന്നു. തീര്‍ച്ചയായും നമുക്ക് അഭിമാനിക്കാം!


ഇതു വായിക്കുന്നവരില്‍ മിക്കവരും പ്രത്യേകിച്ച് കാരണം നിരത്താതെ "പ്രായോജികമല്ല" എന്ന് തള്ളിക്കളയാന്‍ സാദ്ധ്യതയുള്ള പരിഹാരമാണ്‌ എനിക്കു തോന്നുന്നത്.

ആനകളെ മെരുക്കാതിരിക്കുക. ആനയ്ക്ക് നിങ്ങളെ വേണ്ടെങ്കില്‍ നിങ്ങള്‍ക്കെന്തിനാണ്‌ ആനയെ?

ഒരു പൊതുസഭയില്‍ ഞാന്‍ ഈ വീക്ഷണം പറഞ്ഞതും നിശിതമായി പലരും എതിര്‍ത്തെങ്കിലും മുന്നോട്ടു വച്ച ന്യായങ്ങള്‍ തുലോം ദുര്‍ബ്ബലമായിരുന്നു. അവ ഇതൊക്കെ.

ഒന്നാമന്‍ : നാട്ടാനകള്‍ക്ക് കാട്ടാനയെക്കാള്‍ ആയുസ്സ് കൂടുതലാണ്‌ എന്നതിനാല്‍ ആനകളുടെ സം‌രക്ഷണമാണ്‌ യഥാര്‍ത്ഥത്തില്‍ മെരുക്കല്‍ മൂലം നടക്കുന്നത്.
ആന്റണി: ഏതു മൃഗവും ക്യാപ്റ്റീവിറ്റിയില്‍ അല്പം കൂടുതല്‍ ജീവിക്കും .കേരളത്തിലെ ആനകളുടെ ശരാശരി ആയുസ്സ് നിര്‍ണ്ണയിക്കപ്പെട്ടിട്ടില്ല, ക്യാപ്റ്റീവിറ്റി റൂള്‍ വച്ചാണ്‌ നാട്ടാനയ്ക്ക് ആയുസ്സ് കൂടുതലെന്ന് ഊഹിക്കുന്നത്. എന്നാല്‍ നാട്ടാനകള്‍ അപൂര്വ്വമായേ പ്രജനനം നടത്താറുള്ളു എന്നതിനാല്‍ ആനയെ നാട്ടില്‍ വളര്‍ത്തുന്നത് അവയുടെ അംഗസംഖ്യ കുറയ്ക്കുകയേയുള്ളു. മാത്രമല്ല, ആനകള്‍ ക്യാപ്റ്റീവിറ്റിയില്‍ അവയുടെ ശരാശരി ആയുസ്സിന്റെ മൂന്നില്‍ രണ്ടേ ജീവിക്കുന്നുള്ളു എന്നാണ്‌ പല കണക്കുകളും സൂചിപ്പിക്കുന്നത് (http://www.savewildelephants.com/deaths.asp )


രണ്ടാമന്‍: ആനയെ ഇണക്കുന്നതുകൊണ്ടാണ്‌ പൊതുജനത്തിന്‌ ആനയോട് സ്നേഹമുള്ളത്. കാട്ടാനകളെ വേട്ടയാടുന്നതില്‍ നിന്നും ആളുകളെ പിന്‍‌തിരിപ്പിക്കുന്നത് ഐരാവതം, ഗണപതി എന്നിവയായി അവയെ ആളുകള്‍ കാണുന്നതുകൊണ്ടാണ്‌.

ആന്റണി : അനന്തന്‍ വാസുകി ശേഷന്‍ പത്മനാഭന്‍ ഖംബലന്‍ സംഘപാലന്‍ ധൃതരാഷ്ട്രന്‍, തക്ഷകന്‍, കാളിയന്‍ ... നാഗദൈവങ്ങള്‍ അസംഖ്യമുണ്ടായിട്ടും പാമ്പുകളുടെ എണ്ണം കുറയുകയാണല്ലോ? ആനയെ ഗണപതിയായോ ഐരാവതമായോ ജനത്തിനു കാണാന്‍ കഴിയുമെങ്കില്‍ തോട്ടിയും കത്തിയും ഏന്തിയ ഒരുത്തന്‍ അതിന്റെ മുതുകിലിരിക്കുന്നതും ചങ്ങലയിട്ട് നടത്തുന്നതും ജനം ആസ്വദിക്കുന്നതെങ്ങനെ?ഞാന്‍ കടുവയെ ഇണക്കി വളര്‍ത്തിയാല്‍ ജനം കാട്ടുകടുവയെ സ്നേഹിച്ച് ഉമ്മവയ്ക്കുമോ ?

ഒന്നാമന്‍ : ആനകള്‍ തടിപിടിക്കുന്നതുകൊണ്ട് കാട്ടില്‍ റോഡ് വെട്ടുകയോ മറ്റോ ആവശ്യമായി വരുന്നില്ല. ആ നിലയ്ക്ക് ആനകളുടെ സ്വാഭാവിക പരിസ്ഥിതി സം‌രക്ഷിക്കാന്‍ കൂപ്പില്‍ ആനകള്‍ വേണം.

ആന്റണി: ക്ലീയര്‍‍ ഫല്ലിങ്ങോ സെലക്ഷന്‍ ഫെല്ലിങ്ങോ റോഡുകള്‍ ഇന്നില്ലാത്ത ഉള്‍‌വനങ്ങളില്‍ സര്‍ക്കാര്‍ അംഗീകാരത്തോടെ നടക്കുന്നില്ല. ഫെല്ലിങ്ങ് അനുവദിച്ച കേരളത്തിലെ സ്ഥലങ്ങളെല്ലാം തന്നെ റോഡുള്ളവയും ലോറി എത്തുന്ന സ്ഥലങ്ങളുമാണ്‌.

ഒന്നാമന്‍: ആന ചരിത്രാതീത കാലം മുതലേ കേരള സം‌സ്കാരത്തിന്റെ ഭാഗമാണ്‌. ആനയില്ലാത്ത ഉത്സവം വരനില്ലാത്ത കല്യാണം പോലെയേ മലയാളിക്കു തോന്നൂ.
ആന്റണി: ചരിത്രാതീത കാലത്തെക്കുറിച്ച് എനിക്കോ നിങ്ങള്‍ക്കോ ഉറപ്പിക്കാനാവില്ല. ഏതാണ്ട് ഉണ്ണുനീലീചരിതം ഉണ്ണിച്ചിരുതേവീചരിതം എന്നിവയുടെ കാലം വരെ കേരളത്തിലെ അമ്പലത്തിലെ ആനകളെക്കുറിച്ച് പരാമര്‍ശമില്ലല്ലോ. പിന്നെ ആചാരങ്ങള്‍- പണ്ട് കാപാലികര്‍ കേരളത്തില്‍ അറിയപ്പെടുന്ന ഭക്തന്മാരായിരുന്നു. നരബലി പിന്നെ മൃഗബലിയായി, കുമ്പളങ്ങാ വെട്ട് ആയി, ഇപ്പോഴൊന്നുമില്ല. പുരി ജഗന്നാഥന്റെ തേരിനു മുന്നില്‍ ചാടി മരിക്കുന്നത് സ്വര്‍ഗ്ഗം പ്രാപിക്കാനുള്ള വഴിയായിരുന്നു ഒരിക്കല്‍, റ്വാണ്ടന്‍ ഗോത്രരാജാവ് ശത്രുക്കളുടെ ലിംഗം അറുത്ത് കോര്‍ത്ത മാലയായിരുന്നു ആചാരപ്രകാരം ധരിച്ചിരുന്നത്. മനുഷ്യന്‍ പുരോഗമിക്കുന്നതനുസരിച്ച് ആചാരങ്ങളും പരിഷ്കൃതമാവുന്നു. കരിമരുന്ന് പ്രയോഗം ചൈനയില്‍ നിന്നാണ്‌ അമ്പലത്തില്‍ വന്നു കയറിയത്. ഉച്ചഭാഷിണിക്കോളാമ്പി സായിപ്പിന്റേതാണ്‌. എന്തുകൊണ്ട് ആനക്കാര്യത്തിലും നമുക്ക് പരിഷ്കാരിയായി ഒരു അലങ്കരിച്ച ട്രക്കിലോ കാറിലോ ദൈവത്തിന്റെ ആറാട്ട് നടത്തിക്കൂടാ?


രണ്ടാമന്‍ : കേരളത്തില്‍ ആനപിടിത്തം നിരോധിച്ചിരിക്കുന്ന സാഹചര്യത്തില്‍ കോടനാട് കോന്നി തുടങ്ങിയ ആനക്കൂടുകള്‍ ക്യാപ്റ്റീവ് ബ്രീഡിങ്ങ് സെന്ററുകളായി കണ്ട് ആനകളുടെ അംഗബലം കൂട്ടാന്‍ അവ ഉപകരിക്കുന്നെന്ന് കണക്കാക്കാമല്ലോ?
ആന്റണി: ആനകളുടെ പ്രജനനം ക്യാപ്റ്റീവിറ്റിയില്‍ തീരെക്കുറവാണ്‌. ക്യാപ്റ്റീവ് ബ്രീഡിങ്ങ് എന്നാല്‍ മനുഷ്യന്റെ ഇടപെടല്‍ മൂലം ജന്തുക്കളുടെ അംഗബലം വര്‍ദ്ധിപ്പിക്കലാണ്‌. അതു പൂര്‍ണ്ണമാവുന്നത് ആ മൃഗങ്ങളെ തിരിച്ച് വന്യതയില്‍ വിടുമ്പോഴും. ഇങ്ങനെയൊന്നും അവിടെ സംഭവിക്കുന്നില്ല, സംഭവിക്കുകയുമില്ല (ശേഷം അന്താരാഷ്ട്ര ആന ഡേറ്റ പരിശോധിച്ചപ്പോള്‍ കോടനാട്ട് ആറാനയുണ്ടായിരുന്നെന്നും അശ്വതി എന്ന പിടി ഒഴികെ എല്ലാം എവിടെന്നു വന്നെന്ന് "അറിയില്ല" അല്ലെങ്കില്‍ മറ്റു സംസ്ഥാനങ്ങളില്‍/ സാഹചര്യങ്ങളില്‍ വനത്തിലെ ആനകള്‍ പിടിയിലായെന്നും കാണുന്നു. ഇവയില്‍ രണ്ടെണ്ണം ചരിഞ്ഞെന്നും കാരണം വൈറസ് ബാധയെന്ന് സംശയിക്കുന്നെന്നുമാണ്‌ കണ്ടത് . ലിങ്ക് കൊടുത്തിട്ടുണ്ട്)

മൂന്നാമന്‍: ആനയെ സം‌രക്ഷിക്കാനുള്ള നിയമം ശക്തമാക്കിയാല്‍ പരിഹരിക്കാവുന്ന കാര്യങ്ങളല്ലേയുള്ളു ഇതൊക്കെ?

ആന്റണി: ധാരാളം നിയമങ്ങള്‍ ഇപ്പോള്‍ തന്നെയുണ്ട്. പാലിക്കപ്പെടുന്നില്ല. ആനയെ ഇത്രമണിക്കൂറേ ജോലി ചെയ്യിക്കാവൂ, കുട്ടിയാനയ്ക്ക് ചങ്ങലയിടരുത്, പുറത്ത് ആളുകയറരുത്, ആനയുള്ള സ്ഥലത്ത് വെടി പൊട്ടിക്കരുത്, ഒച്ചയുണ്ടാക്കരുത്, ഇത്ര ഭക്ഷണം കൊടുക്കണം എന്നിങ്ങനെ.

ഇനി, ഇതൊക്കെ പാലിച്ചാല്‍ തന്നെ, കൊമ്പനാനകള്‍ക്ക് ക്ഷാമമുള്ളപ്പോള്‍ അവയെ പ്രജനനത്തില്‍ നിന്നും അകറ്റി നിര്‍ത്തുക വഴി ആനയെണ്ണം കുറയാന്‍ കാരണമാവുകയും മെരുക്കലെന്ന പേരില്‍ പീഡിപ്പിക്കുന്നതും ആശാസ്യമല്ല, ആനയെ മെരുക്കി വളര്‍ത്തുന്നതുകൊണ്ട് പ്രത്യേകിച്ച് യാതൊരു പ്രയോജനവും മനുഷ്യനില്ല.
ഓര്‍ക്കുക, അറുനൂറ്‌ ആനകളുള്ള കേരളത്തില്‍ രണ്ടായിരത്തി അഞ്ചു മുതല്‍ രണ്ടായിരത്തി ആറുവരെ ഇരുന്നൂറ്റി പതിനാറ്‌ ആനകള്‍ ചെരിഞ്ഞു- മൊത്തം അംഗസംഖ്യയുടെ മുപ്പത്തഞ്ചു ശതമാനം തീര്‍ന്നു, ആസാമില്‍ നിന്നും ഇവയെ വാങ്ങി കണക്കു ശരിയാക്കിയിട്ടുണ്ടാവും മലയാളികള്‍. (http://www.newindpress.com/NewsItems.asp?ID=IEO20080113233153&Page=O&Title=Thiruvananthapuram&Topic=0 ) ആര്‌ എന്തിനെ ഇണക്കി? ആര്‌ ആരെ സ്നേഹിക്കുന്നു? എന്തിനു വേണ്ടി ഇവയെ ഇങ്ങനെ പീഡിപ്പിച്ചു കൊന്നു തീര്‍ക്കണം? ഇതാണോ ആനക്കമ്പവും ആനസ്നേഹവും?



നെറ്റില്‍ കിട്ടിയ ചില ലേഖനങ്ങള്‍

http://www.flonnet.com/fl2408/stories/20070504003711400.htm

http://www.hinduonnet.com/thehindu/2003/02/07/stories/2003020702850700.htm

http://us.rediff.com/news/2000/jan/10kerala.htm
http://news.bbc.co.uk/1/hi/sci/tech/780015.stm

http://www.elephant.se/location2.php?location_id=892

http://www.thepetitionsite.com/takeaction/119483093

http://www.iht.com/articles/2006/09/24/news/elephant.php?page=2
http://www.thehindu.com/2008/04/24/stories/2008042454900700.htm
http://www.kimwoodbridge.com/elephant/2008/01/13/kerala-elephant-camp-under-herpes-virus-threat/
http://www.hindu.com/2007/04/28/stories/2007042811320500.htm

22 comments:

ശ്രീവല്ലഭന്‍. said...

വളരെ നല്ല ലേഖനം ആന്റണി.....

ശിവ said...

ഈ വിഷയത്തില്‍ ഒരു ചര്‍ച്ച തികച്ചും ആവശ്യമാണ്‌. വെറും ചര്‍ച്ചയല്ല ഒരു തീരുമാനവും അതിന്റെ പ്രായോഗികതയുമാണ്‌ ആവശ്യം. ഇനിയെങ്കിലും മൃഗസ്നേഹികളും ബന്ധപ്പെട്ട അധികാരികളും ഇക്കാര്യത്തില്‍ ആനകള്‍ക്കനുകൂലമായ ഒരു തീരുമാനം സ്വീകരിക്കണമെന്ന് ഞാന്‍ ആഗ്രഹിക്കുന്നു. ആനകള്‍ മാത്രമല്ല വന്യതയില്‍ ജീവിക്കേണ്ട എല്ലാ ജീവികളുടെയും കാര്യവും പരിഗണിക്കണം.

NB: ഒരു മൃഗാവകാശ കമ്മിഷന്‍ തന്നെ തുടങ്ങണം എന്നു തന്നെയാണ്‌ എന്റെ ആവശ്യം.

മൂര്‍ത്തി said...

എനിക്കീ പോസ്റ്റിനോട് മൊത്തം യോജിപ്പുണ്ട്. വിവരങ്ങള്‍ക്കൊക്കെ നന്ദി..ലിങ്കുകള്‍ സമയം കിട്ടുമ്പോള്‍ വായിക്കാം..

പ്രിയ said...

" ഇന്നും കാട്ടിലൊന്നഴിച്ചു വിട്ടാല്‍ അവന്‍ ഒരു സംശയവുമില്ലാതെ കാട്ടാനപ്പറ്റത്തില്‍ ചെന്നു കയറും. കാട്ടാനകള്‍ ചിന്നം വിളിച്ച് അവനെ എതിരേല്‍ക്കുകയും ചെയ്യും. "

ഇതു എനിക്ക് തികച്ചും പുതിയ അറിവായിരുന്നു. ആ പാറക്കുഴിയില് വീണ കുഞ്ഞാനയെ കാട്ടാനകള് എടുക്കാതെ പോയതായിരുന്നു ഞാന് അറിഞ്ഞിരുന്ന സംഭവം.

എന്തായാലും ഗുരുവായൂരപ്പനോഴികെ ബാക്കി ഒരു ദൈവത്തിനും ആന ഉണ്ടെങ്കിലെ ഉത്സവം നന്നാവൂ എന്ന അഭിപ്രായം ഉണ്ടാകില്ലന്നു തോന്നുന്നു. കുമാരനല്ലൂര് ഭഗവതിക്ക് പേടി കാരണം ആന വേണ്ട താനും

തടി പിടിക്കാനും ഭാരം മാറ്റാനും ജെ സി ബി ഉള്ളത് കൊണ്ടു അതും വേണ്ട.

വലിയൊരു ചര്ച്ച നടന്നത് കൊണ്ടു എന്തെങ്കിലും മാറ്റം ഉണ്ടാകുമോ എന്നറിയില്ലെങ്കിലും ആന എന്നത് ആവശ്യമില്ലാത്ത ഒന്നായി തന്നെ ഞാന് വോട്ട് ചെയ്യുന്നു.

ആനയെ കുറിച്ചു ഒരു നല്ല വിശദമായ ലേഖനം. നന്ദി അനോണി ആന്റണി.

ഗുരുജി said...

വളരെയേറെ സന്തോഷം തന്ന ഒരു ലേഖനം. വളരെയേറെ ഇന്‍ഫോര്‍മേറ്റീവ് ആണിത്. ഈ ഒരു സാഹചര്യത്തില്‍ ഇങ്ങനെയൊരു ലേഖനം വായിക്കാന്‍ ലഭിച്ചതില്‍ അതിയായ സന്തോഷം. ഇതുനുവേണ്ടി കണ്ടെത്തിയ സമയത്തിനും ശ്രമത്തിനും ഒരുപ്പട്‌ നന്ദി മാഷേ......സൂപ്പര്‍

കുറ്റ്യാടിക്കാരന്‍ said...

നല്ല ലേഖനം ആനണീ... സോറി, ആന്റണീ...

ആനകളെ വെറുതെ വിടൂ...
അവ കാട്ടില്‍തന്നെ കഴിഞ്ഞോട്ടെ.

മനുഷ്യന്മാരുടെ ദര്‍ശനസുഖത്തിന് പാവം ആനകളെ ബുദ്ധിമുട്ടിക്കുന്നതെന്തിനാ?

Radheyan said...

തികച്ചും കാലിക പ്രസക്തം.

ആനകളെ അവയുടെ പാടിനു കാട്ടിലേക്ക് വിടൂ.ബന്ധുരകാഞ്ചന കൂട്ടിലാണെങ്കിലും ബന്ധനം ബന്ധനം തന്നെ എന്നു കരുതുന്ന സ്വാതന്ത്ര്യവാഞ്ചയുള്ള മൃഗമാണ് ആന.

ആന അപരിമിതമായ നയനസുഖം തരുന്ന ജീവിയാണ്.വലുതിന്റെ മനോഹാരിത എന്നൊക്കെ പറയാം.എങ്കിലും നെറ്റിപ്പട്ടം കെട്ടി വിഭൂഷിതനായി എങ്കിലും ഇടചങ്ങലയുടെ അപമാനത്തില്‍ എലിവില്ലില്‍ കുടുങ്ങിയ മൂഷികനെ പോലെ ബന്ധിതനായ ആനയെക്കാള്‍ സഹ്യന്റെ മടിത്തട്ടില്‍ സഖിമാരും കുഞ്ഞുങ്ങളുമായി പാംശുസ്നാനത്തിലും ജലകേളിയിലും മതിമറക്കുന്ന വന്യത കാണാനാണ് ഞാന്‍ ഇഷ്ടപ്പെടുന്നത്.നമ്മുടെ നയനസുഖത്തിനു മറ്റൊരു ജീവിയെ കഷ്ടപ്പെടുത്തുന്നത്,അതും സാംസ്ക്കാരികതയുടെ പേരില്‍, നീതീകരിക്കുക വയ്യ.
ഇത് സംസ്ക്കാരശൂന്യതയാണ്,ക്രൂരതയാണ്.

ആനകളെ കാട്ടിലേക്ക് വിടൂ,അവര്‍ സ്വൈര്യമായി ജീവിക്കട്ടെ

(ത്രിശൂര്‍ക്കാരടക്കമുള്ള മലയാളികള്‍ കേള്‍ക്കുന്ന്നുണ്ടോ ആവോ)

തണല്‍ said...

ആന്റണി
ലേഖനം നന്നായിരിക്കുന്നു
‘കാടല്ല നാട്
കാട്ടാന അല്ല നീ
കാലില്‍ നിനക്കും വിലങ്ങുണ്ട് നാളെ
കാടിന്റെ ഈണവും
താരാട്ട് മൂളലും
കാവലും കരുതലും നഷ്ടമായോനേ...”
കുട്ടിയാനയോടുള്ള അമ്മയുടെ ആകുലതകള്‍ എന്റെ ചങ്ങാതി ഒരു കവിതയില്‍ കുറിച്ചത്.

തമനു said...
This comment has been removed by the author.
സി. കെ. ബാബു said...

വിശദമായ നല്ല ലേഖനം.

"ഒരു ചാണ്‍ വയറിനു വേണ്ടിയും" എന്നു് വായിച്ചപ്പോള്‍ ചിരിച്ചുപോയി. ലേഖനത്തിന്റെ ഗൌരവസ്വഭാവത്തിനു് അതുവഴി ഭംഗം വന്നു എന്നല്ല.

തമനു said...

കഴിഞ്ഞ ദിവസം കൂടല്‍ മാണിക്യ ക്ഷേത്രത്തില്‍ ആന ഇടഞ്ഞതും അതില്‍ 3 പേര്‍ മരിക്കാനിടയായതും ഒക്കെ വായിച്ചപ്പോഴും ഞാനും ഇത്തരത്തില്‍ ചിന്തിച്ചിരുന്നു.

കാട്ടില്‍ നിന്നും നാട്ടില്‍ ഇറങ്ങുന്ന എന്തിനും പോന്ന ഒറ്റയാന്മാരെ നമ്മള്‍ പേടിപ്പിച്ച് ഓടിക്കുന്നത് പോലും തീ കാണിച്ചും, ഉച്ചത്തില്‍ ശബ്ദമുണ്ടാക്കിയും ആണ്. ചുരുക്കത്തില്‍ ഈ ജീവികള്‍ക്ക് പേടിയുള്ളത് തീയോടും, വലിയ ശബ്ദത്തോടും ആണെന്നു കാണാം. എന്നിട്ടും നമ്മുടെ ‘ദര്‍ശന സുഖത്തിനായി’ നമ്മള്‍ അവയുടെ മുന്നില്‍ തീവെട്ടികളും പിടിച്ച്, അവയുടെ ചെവിക്കീഴില്‍ ചെണ്ടമേളം നടത്തും. അന്തോണിച്ചന്‍ പറഞ്ഞപോലെ എന്തൊരു സമ്മര്‍ദ്ദമായിരിക്കും ഒന്നനങ്ങാന്‍ പോലും കഴിയാതെ നില്‍ക്കുന്ന അവയ്ക്ക്.

പ്രകോപനമില്ലാതെ ആനകള്‍ ആക്രമിക്കുന്നത് വളരെ അപൂര്‍വമാണ് (ഒരു പക്ഷേ അത്തരം അപൂര്‍വതകളിലും നമുക്കറിയാത്ത എന്തോ ഒരു പ്രകോപനം ഉണ്ടായിരുന്നിരിക്കാം.) കൂടല്‍ മാണിക്യ ക്ഷേത്രത്തില്‍ ആരോ ആനയുടെ കൊമ്പില്‍ പിടിച്ച് വലിച്ചതാണത്രേ അതിന് ഇത്രയും കലിയിളകാന്‍ കാരണം :( . (ചുമ്മാ പുറകേ ചെന്ന് കളിയാക്കിയതിന് ഹര്‍ഭജന്‍ വരെ ശ്രീശാന്തിനെ തല്ലി, പിന്നാ കൊമ്പേല്‍ തൂങ്ങിയേന് ആന..) മിക്കപ്പോഴും നിരപരാധികളാണ് ഇവയുടെ ദേഷ്യത്തിന്റെ ഫലം അനുഭവിക്കുക എന്നുള്ളതാണ് ഏറ്റവും സങ്കടകരം.

വളരെ പ്രസക്തവും, ഇന്‍ഫൊര്‍മേറ്റീവും ആണ് ആന്റണിയുടെ ഈ ലേഖനം. എല്ലാവരുടേയും ശ്രദ്ധ അടിയന്തിരമായി ഈ വിഷയത്തില്‍ പതിയേണ്ടിയിരിക്കുന്നു.

ഓടോ : http://www.telegraph.co.uk/earth/main.jhtml?xml=/earth/2008/02/29/eaeleph129.xml , http://www.green-planet.nl/greenplanet/RTTW

ഈ ലിങ്ക് വര്‍ക്ക് ചെയ്യുന്നില്ല.

JA said...

തീര്‍ച്ചയായും കേരളത്തിലെ പൊതുസമൂഹം അടിയന്തരമായി ചര്‍ച്ച ചെയ്യേണ്ട വിഷയമാണിത്‌. ക്ഷേത്രകമ്മറ്റിക്കാര്‍ക്ക്‌ അലോസരമുണ്ടാക്കുമെന്ന കാരണത്താല്‍ മുഖ്യധാരാ മാധ്യമങ്ങള്‍ ഇക്കാര്യം മറച്ചുപിടിക്കുന്നു. മലയാളികളുടെ വ്യാജഅഭിമാനത്തിന്‌ ഇരയാവുകയാണ്‌ ആനകള്‍.

ഇന്നത്തെ (27ഏപ്രില്‍2008) 'ഹിന്ദു'വില്‍ ഒരു റിപ്പോര്‍ട്ടുണ്ട്‌. ഇത്തവണ പതിവിലും കൂടുതല്‍ ആനകള്‍ ഉത്സവങ്ങള്‍ക്ക്‌ ഇടയാന്‍ ഇടയായതിന്‌ കാരണം, അവിചാരിതമായുണ്ടായ കാലാവസ്ഥാമാറ്റമാണത്രേ. ശക്തിയായി പെയ്‌ത, നീണ്ടുനിന്ന വേനല്‍മഴ അന്തരീക്ഷത്തിന്റെയും ആനയുടെയും താളംതെറ്റിച്ചിരിക്കുന്നു. ആനകള്‍ക്ക്‌ മദമിളകുന്ന കാലയളവ്‌ നേരത്തെയാകാന്‍ കാലാവസ്ഥാമാറ്റം കാരണമയി. SPCA യിലെ ആന വിദഗ്‌ധനായ ഡോ.ബി.അരവിന്ദിന്റേതാണ്‌ ഈ നിഗമനമെന്ന്‌ ഹിന്ദു റിപ്പോര്‍ട്ട്‌ പറയുന്നു.

റോബി said...

ആനയെ അടുത്ത്തു കണ്ടപ്പോഴെല്ലാം എന്താണ്‍നതിന്റെ കണ്ണുകളിലെ ദൈന്യത എന്നു ചിന്തിച്ചിട്ടുണ്ട്.

ആര്‍ഭാടത്തിനു വേണ്ടി ആനപ്രേമം പറഞ്ഞു നടക്കുന്നവര്‍ ഇതു വായിക്കുന്നുണ്ടാകുമോ?

lakshmy said...

ത്രിശ്ശുര്‍ ഒരു പള്ളിയില്‍ ആ‍ന ഇടഞ്ഞു പാപ്പാനെ കുത്തിയും ചവിട്ടിയും കൊല്ലുന്നത് ദ്രുശ്യമാധ്യമങ്ങള്‍ സം‌പ്രേക്ഷണം ചെയ്തത് മനുഷ്യമനസ്സാക്ഷിക്കെതിരായിരിക്കാം. എങ്കിലും ഒരു ഭീകരവന്യമ്രിഗത്തിന്റെ കയ്യില്‍ പെട്ട് കുത്തുകൊണ്ടും ഒരു പൂക്കുല തല്ലും പോലെ തല്ലിച്ചതക്കപ്പെട്ടും മരിച്ച ആ മനുഷ്യന്റെ ജീവന്‍ പിടഞ്ഞുള്ള കരച്ചിലില്‍ നിന്നും നമ്മുടെ ചെവികളെ തിരിക്കാനാവുമോ? അതു പോലെ എത്ര ജീവനുകള്‍ പൊലിയുന്നു. ഇത്രയും അപകടകാരിയായ ഒരു മ്രിഗത്തെ ഇനിയും മെരുക്കുന്നതും കോണ്ടു നടക്കുന്നതും തടയാന്‍ ശക്തമായ നിയമം കൊണ്ടു വരികയാണ് വേണ്ടത്. അനോണി ആന്റണിയുടെ ഈ ലേഖനം ശ്രദ്ധേയം. എല്ലാവരും ഇതുപോലെ ചിന്തിച്ചിരുന്നുവെങ്കില്‍.

പാമരന്‍ said...

യോജിക്കുന്നു.

പ്രിയ said...

ലക്ഷ്മി പറഞ്ഞതിനോട് യോജിക്കുന്നു. ഒരു ശരിയായ നിയമം വന്നാല്‍ അമ്പലത്തിനോ സമ്മേളന്ങ്ങള്ക്കോ ഉല്ഘാടനങ്ങള്ക്കോ ആ ജീവിയെ എഴുന്നള്ളിക്കുന്നത് അത്ര ആവശ്യം അല്ലാതെ വരും. (പ്രത്യേകിച്ച് ഇത്തരം ഒത്തിരി സംഭവങ്ങള്‍ ഉണ്ടായിരിക്കുന്ന സ്ഥിതിക്ക്) അങ്ങനെ എന്തെങ്കിലും നിയമ പരമായ നടപടി അടിയന്തിരമായി ഉണ്ടാകേണ്ടതും ആണ്. മൃഗ സംരക്ഷണ വകുപ്പിന്റെ കീഴില്‍ നിന്നെന്കിലും. കടുവയും കരടിയും പുലിയും പോലെ കരയിലെ ഏറ്റവും വലിയ ഈ ജീവിയെ കരുതാന്‍ എന്തെകിലും ചെയ്തേ മതിയാകു. (ആനകംബാക്കാരോട് തേക്കടിയില്‍ പോയി കാണാന്‍ പറയാം )

അനൂപ്‌ എസ്‌.നായര്‍ കോതനല്ലൂര്‍ said...

ആനയുണ്ടെങ്കിലെ ദേവന്റെ തിടമ്പെടുക്കാവു
എന്നു ചിന്തിക്കുന്ന നിയമം മാറാണം ഒരോ
ഉതസവത്തിനും ഏറെ നേരം ഒരു പറ്റം ആളുക്കളെ താങ്ങി പാവം ആനകള്‍ അനുഭവിക്കുന്ന ബുദ്ദ്ധിമുട്ട്
പറഞ്ഞറിയിക്കാന്‍ വയ്യ

Noti Morrison said...

Another good post from Antony. I am sure this will generate much discussion.

I love elephants, both the wild ones and domesticated ones. I am for domesticated elephants, and if people want to use them in temples, so be it. But then we need to make sure that the "nadan" elephants are properly looked after and the "pappans" should be given good training.

The other fact is the proximity of elephants used in the temple with the huge crowd of people. No one other than the trained mahouts should be allowed anywhere near the animal. The recent incident at Irinjalakuda happened because the animal was provoked by either a bystander or an untrained person caring for the animal.

With proper precautions, and giving the animals its needed space and rest, things can continue. Just because a dog can go mad with rabies does not mean that we do not keep them as pets :-)

pradeep said...

ആനയെ നാട്ടില്‍ വളറ്ത്തേണ്ടതില്ല എന്ന അഭിപ്രായം നൂറു ശതമാനം ശരിയാണു.ഇടഞ്ഞാല്‍ ആറ്ക്കും നിയന്ത്രിക്കാന്‍ കഴിയാത്ത, മനുഷ്യജീവനു ഭീഷണിയായ ഈ വന്യ ജീവിയെ വളറ്ത്തുന്നത് നിയമം മൂലം നിരോധിക്കേണ്ട കാലം അതിക്രമിച്ചിരിക്കുന്നു.
നല്ല പോസ്റ്റ്

കുറുമാന്‍ said...

ആന്റണി വളരെ മനോഹരമായ പോസ്റ്റ്. ലിങ്കുകള്‍ എല്ലാം സമയം ലഭിക്കുന്നത് പോലെ വായിക്കണം എന്നുറപ്പിച്ചു.

അതികലശലായ ആനകമ്പം കുട്ടിക്കാലം മുതലേ ഉള്ളതാണെങ്കിലും, ആനകളെ കാട്ടില്‍ വച്ച് കാട്ടാനയായി കാണുന്നതിന്റെ സാഹസികതയും, ദര്‍ശനസുഖവുമൊന്നും അണിഞ്ഞൊരുങ്ങി നില്‍ക്കുന്ന ആ‍നയെ കണ്ടാല്‍ കിട്ടില്ല.

പറമ്പികുളത്തുവച്ചും, ജിം കോര്‍ബറ്റ് നാഷണല്‍ പാര്‍ക്കിലു വച്ചും, ഷോളയാറു വച്ചുമെല്ലാം കാട്ടാനകൂട്ടങ്ങളില്‍ നിന്നും, ഒറ്റയാനില്‍ നിന്നുമെല്ലാം ഓടിയും മരംകയറിയും ഒക്കെ രക്ഷപെടേണ്ടിവന്നിട്ടുണ്ട്, പക്ഷെ അതൊക്കെ ഒരു രസമായിരുന്നു, വന്യജീവികളെ നേരിട്ട് കാണുന്നതിന്റേയും അവയുടെ ഇടയില്‍ നിന്നും രക്ഷപെടുന്നതിന്റേയും. പക്ഷെ ഒരു നാട്ടാനയുടെ കയ്യില്‍ നിന്നും ഈ ആഗസ്റ്റില്‍ രക്ഷപെടാനുള്ള യോഗമുണ്ടായതിനാല്‍ ഇപ്പോ ഇവിടെ ഇരുന്ന് ഈ ലേഖനം വായിച്ച് കമന്റിടാന്‍ കഴിയുന്നു.

നന്ദി ഈ ലേഖനത്തിന്.

Rajeeve Chelanat said...

തന്നിലും വലുതിനെ മെരുക്കിയെന്ന മിത്ഥ്യാഭിമാനത്തിന്റെയും, തന്റെ വീട്ടിലും ആനയുണ്ടായിരുന്നുവെന്ന വീമ്പു‌പറച്ചിലുകളെയുമാണ് ഓരോ തവണയും ഈ മിടുക്കന്മാരായ ആനകള്‍ ചവുട്ടി പേസ്റ്റാക്കുന്നതും, കൊമ്പില്‍ കോര്‍ക്കുന്നതും. പക്ഷേ അതിന് ഇരകളാകുന്നത്, ചില നിരപരാധികളും സാധുക്കളുമാണെന്നതും മഹാസങ്കടം.

ഇതുപോലുള്ള ലളിതവും ശക്തവുമായ തോട്ടികള്‍കൊണ്ട് എല്ലാ വലിയ ആനക്കമ്പങ്ങളെയും ഇനിവരുന്ന പോസ്റ്റുകളിലും അടിച്ചിരുത്തുക. കാത്തിരിക്കുന്നു.

അഭിവാദ്യങ്ങളോടെ

Baiju The Jungle Boy said...

വളരെ നല്ല ഒരു ലേഖനം.