പ്രമോക്ഷം

അന്തപ്പാ, തരക്കേടില്ല.
എന്തര്‌?
നിന്റെ ഈയാണ്ട് പെര്‍ഫോര്‍മന്‍സും, കമ്പനി മൊത്തത്തിലെ പെര്‍ഫോര്‍മന്‍സും.

തന്നേ?
തന്നെ.

എന്തരേലും കൂട്ടി തരീ എങ്കി.
ദാ തൊടങ്ങി! നിന്റെ ഈ കൊണ്ടുവാ കൊണ്ടുവാ വിളി കേട്ട് കേട്ട് എനിക്ക് വട്ടായി. ഇത്തവണ എത്ര കൂട്ടണം? പത്ത് ശതമാനം?

പത്ത് എന്തരിന്‌, എനിക്ക് നെറ്റിയേ പോറാനോ?
ഇരുപത്?

ദുബായിലെ പണപ്പെരുപ്പ നിരക്ക് ഇരുപത് ശതമാനമാ. ഇങ്ങനെ കൂട്ടിയിട്ട് ഒരു പോതരവുമില്ല.
നീ ഒടുക്കത്തെ ബാര്‍ഗെയിനിങ്ങ് ആണല്ലോടേ.

മീനു വെല പറഞ്ഞ് പറഞ്ഞ് ശീലമായതാ.
മുപ്പത് ശതമാനം?

ഹും..
അതും പിടിച്ചില്ലേ? എന്നാ എന്റെ കസേര നിനക്കു തരട്ടോ?
കാശിന്റെ കാര്യം പറയുമ്പ കളിയെടുക്കല്ലേ പറങ്കിയണ്ണാ. കാപെറുക്കികളുടെ മനസ്സു വേദനിച്ചാലും ശാപം ഏക്കും.

കളിയല്ലെടേ, എനിക്ക് മാറ്റമായി, ഞാന്‍ ദേണ്ട് പരന്ത്രീസിലെ ഹെഡ്ഡാപ്പീസിലോട്ട് തിരിച്ചു പെയ്യൂടണവെന്ന്.ഇഞ്ഞി ഈ കസേര നീയെടുത്തോ, ദാ പേപ്പറ്.
ങേ?

അന്തപ്പായീ?
അന്തപ്പായീ?? തള്ളേ ലിവന്റെ കാറ്റു പോയോ?
ഹില്ല, ഒന്നു ശാസം മുട്ടിയതാ. ചൊവ്വായിവര്‌ന്ന് ഇപ്പ.

ബെസ്റ്റ് ഓഫ് ലക്ക് അന്തപ്പാ, ഇവിടിരുന്ന് നീ എന്നെക്കാള്‍ ഷൈന്‍ ചെയ്യ്.
മുഴുത്ത നന്ദി പറങ്കിയണ്ണാ, കഴിവിന്റെ പരമാവധി ശ്രമിക്കാം.

ശരി, എന്നാ പിന്നെ എല്ലാരേം അറിയിക്കാം അല്ലേ?
അങ്ങനെ തന്നെ.